imos de excursión

EXCURSIÓN ÁS BEIRAS DO RÍO MIÑO

Un ano máis a Asociación organiza a excursión anual, que este ano terá como destino as beiras do Río Miño, coa visita ás vilas de Tui e Valença do Minho.

Día: 31 de maio de 2009

9:00 h. Saída da Taberna de Ouzande.

10.30 Chegada a Tui.

11:00 Paseo pola fermosa cidade de Tui. Percorrido polo seu magnífico casco histórico e visita á Catedral. Tamén nos achegaremos ás beiras do Río Miño.

14:00 Xantar no Monte Aloia. Trátase dun fermosísimo parque natural, que está perfectamente acondicionado para o xantar campestre.

16:30. Cruzaremos a pé (é un pequeno paseo) a antiga ponte de ferro ata Portugal.

17:00. Visita a Valença do Minho e a súa Fortaleza. Tarde relaxada para o paseo e podermos tomar un rico café portugués.

Prezos da viaxe. Para socios e socias:

8 euros(adultos)

3 euros(menores de 14 anos)

Gratis para menores de 6 anos.

Para o público en xeral: 12 euros.

Inscrición. Na taberna de Ouzande (986570285), ata o venres 29 de maio. Dispoñemos de 55 prazas. Así que a anotarse canto antes...

Xantar. Cada persoa/familia levará o xantar.

Recomendación importante. Levar calzado cómodo e tamén recomendamos levar catalexos, quen os teña.

choveu

Os valentes que viñeron esperaron na taberna. Non escampou.
Ao final foi un café con letras.

ruta das letras

ANDAMOS E FALAMOS

O próximo sábado 16 de maio, a AC A Fervenza de Ouzande continuará co seu programa de rutas a pé, IMOS ANDAR coa cuarta Ruta das Letras. Este ano percorreremos o Roteiro dos Montes da Somoza, cuxas características detallamos máis abaixo. Ademais, todos e todas as participantes serán avasallados cun libro, para celebrar o Día das Letras Galegas, que será entregado ao final da ruta. Para esta iniciativa contamos coa xenerosa colaboración de Edicións Xerais de Galicia.

Hora de saída: 16:30 da tarde, diante da igrexa de Ouzande. Chegada sobre as 20:30 ao mesmo sitio.

LUGARES DE INTERESE: no noso percorrido habémonos atopar cos seguintes puntos de interese:

- Montes do Pedroso e A Pedralba: posto que albergan numerosas especies autóctonas que sobreviviron as reforestacións masivas de coníferas, especialmente de piñeiros e eucaliptos. É unha zona de especial beleza pola vexetación que conserva numerosas especies autóctonas (varias carballeiras, bosque de acevos, vexetación dos cursos fluviais, salgueiros, ameneiros...).

- Monte Cabalar: A rota discorre en parte a través das parcelas incluídas no coñecido proxecto “Monte cabalar”. Alí un dos responsables do mesmo dará unha breve explicación sobre os resultados desta iniciativa.

- Vistas panorámicas: fermosas vistas paisaxísticas cara ao val do río Liñares co monte da Rocha ao fondo. Tamén se divisa neste percorrido a vila da Estrada desde numerosas perspectivas, así como a cidade de Compostela, o val do río Ulla, Pico Sacro, montes da Somoza...

- Pozo da Freixa. Na Somoza faremos unha parada no fermoso contorno do Pozo da Freixa, no que descansaremos ao pé de dous antigos muíños e unha fervenza.

ruta do regueiro de arcos

O pasado primeiro de maio botámonos a andar polos carreiros de Arcos. Percoremos os camiños de Ferreiros co obxectivo de descubrir as orixes do Río Gallo, o que os ouzandeses chamaban Regueiro de Arcos. Saímos ás 10 da mañá da Taberna de Ouzande para subir en coches ata a aldea de Ferreiros, alí deixámolos para facer uso de varias pistas forestais que nos habían levar até o regueiro. Alí marabillámonos da fermosura deste espazo e botámonos a andar regueiro arriba, deixámonos seducir polos caprichos da natureza, saltamos coma cabras de penedo en penedo e rimos á esgalla. Vimos o que supostamente é un batán e muíños, moitos muíños. Atravesamos a pontella de Arcos, a que levou a máis dun ouzandés cara Arcos co fin de mocear. Recordamos as historias que moitos escoitamos do medo que daba atravesar esta zona de noite. Dámos creto, debe dar medo. O remate foi nunha fermosa fervenza, da que tivemos que saír nunha operación de escalada á ouzandesa... xa onda os coches esperábanos unha espedición de cabaleiros e cabaleiras da parroquia. O bo tempo axudou a pasarmos unha bonita e animada mañá de primavera en compaña fervenceira.
manuel de topete

imos andar

Ola! Xa estamos aquí outra vez. Chegou a primavera e hai que andar por aí ao aire. Volvemos co programa Imos Andar, e para este venres, primeiro de maio, temos planeado un roteiro novo. Percorreremos os camiños de Ferreiros (aldea próxima do Concello de Cuntis) para descubrir as orixes do Río Gallo, o que os ouzandeses chamaban Regueiro de Arcos.
Hora de saída: 10 da mañá.
Lugar: Taberna de Ouzande.
Regreso: Sobre a unha da tarde.
Dificultade: Trátase dun percorrido curto, pero no que encontraremos algún atranco nas beiras do río, recentemente acondicionadas.
Poderemos gozar de paisaxes tan fermosas coma esta...

imaxes antroido 09

Aí quedan unhas imaxes do antroido en Ouzande. Os cegos cantaron as súas coplas acompañados por unha comparsa de disfraces que percorreron a parroquia na carroza do antroido eleitoral

E tamén un video dos cegos cantando un anaco das coplas na taberna de Ouzande. As coplas podelas ler picando nos comentarios.

antroido 09

SÁBADO DE ANTROIDO
21 de febreiro de 2009

A partir das 17:00 da tarde concentración de disfraces no Campo da Festa. A continuación, a unha carroza percorrerá os lugares da parroquia acompañando aos cegos do Antroido que, un ano máis recitarán as súas coplas, que non esquecerán os acontecementos da parroquia nin tampouco a actualidade en xeral. Non faltarán a música nin as cancións.

Horario aproximado:

17:15 da tarde: saída do campo

17:30: O Tallo

18:00:. O Castro

18:15: O Picoto e o Redondo

18:35: Alemparte e O Formigueiro

19:00: O Topete

19:15: Igrexa

E como remate a partir das 19:30 da noite, gran festa de disfraces no local social. Música, animación e degustación dos produtos típicos do antroido.

imaxes asemblea

aí quedan unhas fotos da xunta xeral

xunta xeral anual

CONVOCATORIA DE XUNTA XERAL ANUAL

Convócase aos socios e socias á Xunta Xeral anual da Asociación Cultural A Fervenza de Ouzande, que terá lugar o domingo 15 de febreiro ás 6 da tarde no local social do campo da festa de Ouzande. A orde do día será a seguinte:

1. Informe de xestión.

Informe de actividades (con proxección de fotos e videos)
Informe económico

2. Programación de actividades.
3. Rogos e preguntas.

Ao rematar a reunión a asociación convida á merenda con chocolate quente e biscoito.

En Ouzande, A Estrada, febreiro 2009.

PD.

1. É moi importante que fagas o posible por asistir á reunión para que entre todos colaboremos na boa marcha da asociación, e na proposta e organización de actividades. Recorda que a Asociación somos todos e todas.

2. Na taberna de Ouzande están a disposición de todos os socios e socias os recibos da cota anual correspondente a este ano, e os pendentes do ano anterior (para os socios/as que non pagaron aínda). Recorda que para a organización das actividades é moi necesario dispoñer dos recursos económicos que xeramos .