Feliz 2019 e bo camiño

No 2019 facemos 18. Seguimos andando camiños. Feliz ano novo.

Ruta de Nadal 2018. Polos carreiros de Ouzande

Un grupo de 20 persoas atreveuse a camiñar o pasado 25 de decembro polos carreiros de Ouzande. Bo día e boa compañía. Picando na imaxe poderás ver as mellores fotos do paseo.

Nova xornada de convivencia e formación da Xunta Directiva

Por segundo ano consecutivo, o Albergue de Sabucedo acolleu unha xornada de traballo e convivencia da Xunta Directiva. Falamos sobre os novos proxectos da Asociación e o camiño percorrido e por percorrer.
Foi o pasado 25 de novembro. Aí quedan unhas imaxes.

Atréveste? Ruta de Nadal 2018

EN NADAL TAMÉN IMOS ANDAR

O próximo martes 25 de decembro, a AC A Fervenza de Ouzande inicia o co seu programa de Actividades do Inverno coa convocatoria da novena edición da Ruta de Nadal. Nesta ocasión escolleuse a Ruta dos Carreiros de Ouzande

A Asociación convida a pasar a mañá do día de Nadal dun xeito diferente. Disfrutaremos da paisaxe, da natureza e da conversa amigable, e seguro que tamén para alixeirar a copiosa cea de Noiteboa. A actividade é gratuíta.

PERCORRIDO: 11 quilómetros, atravesando os diferentes lugares de Ouzande (O Redondo, O Castro, O Picoto, O Formigueiro e Alemparte) polos antigos carreiros e camiños, reparando en diferentes puntos de interese como fontes, lavadoiros e antigas calzadas. Unha parte do roteiro cruzará o monte de Ouzande, con numerosas carballeiras e pequenos bosques de acivros. Tamén percorreremos un tramo da Ruta da Fervenza e muiños de Ouzande.

DIFICULTADE: baixa

MATERIAL: levar roupa cómoda, calzado apropiado, e ter en conta a predición meteorolóxica.

SAÍDA: 10:15 (Igrexa de Ouzande)

REGRESO: 13:15h (Igrexa de Ouzande)

PUNTOS DE INTERESE: no noso percorrido habémonos atopar cos seguintes puntos de interese:

-igrexa de Ouzande: É de estilo orixinalmente románico, conserva elementos da época coma os canzorros que son únicos na zona ao representaren pecados condenados pola Igrexa. Tamén destaca o seu arco central, o agnus dei, o retablo barroco do Carme...

-cruceiros: hai dous que están nas inmediacións da igrexa, un deles é dos máis antigos da zona, foi recollido por Castelao en As Cruces de Pedra da Galiza.

-muíños da Fervenza: conxunto formado por sete muíños distribuídos en pouco máis de cincocentos metros, o máis antigo data do S.XVIII. É unha zona de especial beleza pola vexetación que conserva numerosas especies autóctonas (varias carballeiras, bosque de acivros, vexetación do curso fluvial do regueiro da Fervenza, salgueiros, ameneiros...). Destaca a orografía que crea neste punto a famosa Fervenza, aínda que son numerosos os cachóns ou pichos, ao longo desta parte de percorrido fluvial na nosa ruta.

Magosto 2018

Non puido celebrarse a Foliada de Outono por causa do mal tempo, pero comemos castañas e cantamos e bailamos a cuberto.

Foliada de Outono en Ouzande

A Fervenza de Ouzande presenta un novo proxecto festivo e musical, A Foliada de Outono. A Asociación promove desde a súa fundación en 2001, a difusión da nosa música a través da organización de actividades diversas. Desde as clases de música, canto e baile tradicional que cada ano acollen a máis de 60 persoas de todas as idades, ata a organización de eventos festivos como foron o FESTIVAL MÚSICAS DA TERRA, que xuntou aos mellores grupos de música galega en Ouzande ata o ano 2007, cando se deixou de organizar, despois da súa novena edición.

No ano 2008 encetouse un novo proxecto, A Fervenza de Músicas. Un formato de festa tradicional con música a pé de campo e que se facía cadrar coas festas parroquiais do mes de setembro en Ouzande. Ducias de grupos de música tradicional e centos de músicos pasaron polo campo da festa da parroquia ata o ano 2016 onde baixou o tea esta proposta tamén na súa novena edición.

Neste ano 2018 recuperamos o impulso e propoñemos un novo evento festivo e musical. A Foliada de Outono trata de xuntar a proposta musical e a festiva e estacional nun mesmo evento. Así, ofrecemos unha Foliada cunha importante oferta musical acompañada da celebración da estación do outono.

O programa desta Foliada de Outono será:
Data: Sábado 10 de novembro

Lugar: Campo da Festa de Ouzande

Hora: 20:00 horas

Grupos musicais

Banda de Gaitas INVERNÍA (Ouzande, Costa da Morte, Santiago e Vedra)

Grupo de canto tradicional RECANTO DE OUZANDE

Foliada aberta

Xogos tradicionais e populares desde o inicio da festa

Castañas asadas de balde para os asistentes

Haberá posto de polbo e churrasco e servizo de bar.

Haberá carpa.

Recanto de Ouzande no Magosto de Marrozos, en Santiago de Compostela

Este pasado sábado, 3 de novembro, o grupo de cancións tradicionais de Ouzande, Recanto, acudiu ao convite realizado pola Asociación Veciñal de Marrozos que celebraba o seu magosto anual. Achegaronse tamén varios compoñentes do grupo Retrouso para reforzar aos gaiteiros locais. Tamén actuaron as pandereteiras da Asociación Pena Maior de Marrozos. Gran festa e gran ambiente musical. Aí quedan algunhas fotos do evento:

As fotos da Ruta de Outono 2018. Camiño do Río Gallo

O pasado 28 de outubro tivo lugar unha nova edición da Ruta de Outono organizada pola Asociación. Participaron 15 persoas, a pesar das malas previsións meteorolóxicas e do frío case invernal co que amenceu o día. Ao final as inclemencias do tempo respectaron aos camiñantes que desenvolveron a camiñada segundo o programa previsto, mesmo regresando con media hora de adianto. Coma sempre, bo ambiente e camiño relaxado e atendendo aos comentarios que os organizadores achegaban sobre os diferentes puntos de interese. Quedaron citados todos os participantes para a próxima, o vindeiro 25 de decembro, día de Nadal.
Picando na imaxe poderas ver as mellores fotos da camiñada.

Ruta de Outono 2018. CAMIÑO DO RÍO GALLO

RUTA DE OUTONO. Camiño do RÍO GALLO

A Asociación da comezo á súa programación de actividades de outono coa realización dunha ruta a pé.

Terá lugar o próximo domingo 28 de outubro e nela poden participar todas as persoas interesadas. Trátase dunha actividade gratuíta e a inscrición realizarase no momento da partida.

A seguir achéganse todos os datos da mesma e infórmase que a actividade só se suspenderá en caso de que as condicións climatolóxicas impidan completamente o desenvolvemento da mesma.

Datos:

Saída: 9:30 da mañá.

Chegada: 13:30

Lugar: Igrexa de Ouzande

Dificultade media-baixa.

Distancia: 12 km

Recoméndase levar un bo calzado de ruta, así como roupa apropiada para a época do ano, e atender ás previsións meteorolóxicas.

Puntos de Interese

- Fonte do Redondo. Perto da saída atravesaremos o fermoso contorno da Fonte do Redondo, en Ouzande, onde a auga abrolla directamente desde o chan.

- Montes de Ouzande. O percorrido inclúe na súa primeira parte camiños a través dos montes da parroquia, onde se combinan masas de árbores autóctonas, de extraordinaria beleza, con outras de coníferas e foráneas.

-Castro de Arcos. Rodearemos este fermoso promontorio no noso percorrido.

-Montes de Arcos. Percorreremos parte dos frondosos bosques dos Montes de Arcos, con masas arbóreas autóctonas de carballos, castiñeiros e acivros.

-Río Gallo. Atravesaremos o Río Gallo, perto do seu nacemento, moi próximo ao límite da parroquia de Ouzande, A Somoza e Arcos. Paraxe fermosa con numerosos saltos, estanques e flora típica de ribeira.

-Aldea de Ferreiros. Pertence ao concello de Cuntis, aínda que historicamente sempre existiu unha grande relación entre os seus habitantes e os veciños de Ouzande.

-Muíños da Fervenza de Ouzande. Contorno de 7 muiños e un pozo. No camiño de volta atravesaremos esta contorna, que da nome á asociación. É unha zona de especial beleza pola vexetación que conserva numerosas especies autóctonas (varias carballeiras, bosque de acivros, vexetación dos cursos fluviais, salgueiros, ameneiros...).

 Mapa da ruta

O curso 2018-19 en marcha.

 

Faro de Vigo

Deron comezo as clases de música e baile tradicional en Ouzande nas disciplinas de acordeón, gaita, percusión, pandeireta, baile e canto tradicional. AÍNDA TEMOS SITIO PARA TI. Achégate nos horarios que se achegan ao local de Ouzande, A Estrada, para coñecernos e informarte. 

Recanto de Ouzande na Mostra de Teatro de Orazo

O pasado 22 de setembro tivo lugar a XII edición da Mostra de Teatro Cotomanguelo de Orazo. O grupo de cancións tradicionais Recanto de Ouzande e o grupo de gaitas da Fervenza de Ouzande tiveron a honra de participar no evento. Noite animada e festeira cos grupos Lilaila de Orazo e Gaiteiros da Pereiriña. Moitas grazas á organización por convidarnos e tratarnos tan ben.

Bailas? Clases de Música e Baile tradicional en Ouzande. Curso 2018-19

Dan comezo as clases deste novo curso. Un ano máis, a Asociación ofrece a todas as persoas interesadas as diferentes disciplinas destas clases que comezaron no ano 2002.

Estas serán: Acordeón, gaita, percusión, pandeireta, baile e canto tradicional.

As clases darán comezo o próximo 29 de setembro, e terán lugar todos os sábados nos horarios que se detallan ao final.

As persoas interesadas poden solicitar información ou inscribirse no correo electrónico da asociación: carreirosouzande@gmail.com, na páxina do facebook https://www.facebook.com/afervenza.deouzande

ou no blog www.carreiros.blogspot.com.

Tamén se poden inscribir asistindo no horario que se indica a partir do próximo sábado 29 de setembro.

TODOS OS SÁBADOS

ACORDEÓN
10:30 a 11:30

Profesor: Marcos Varela.

GAITA (Iniciación)

11:30 a 12:30

Profesor: Marcos Varela.

GAITA (Perfeccionamento)
12:30 a 13:45
Profesor: Marcos Varela.

TAMBORIL (Iniciación)

10:30 a 11:30

Profesor: Xosé Martíns, Fofi

TAMBORIL (Perfeccionamento)
11:30 a 12:30

Profesor: Xosé Martíns, Fofi
PANDEIRETA (Iniciación)
17:30 a 19:00

Profesora: Silvia Martínez

PANDEIRETA (Perfeccionamento)
18:30 a 20:00

Profesora: Silvia Martínez

BAILE
20:30 a 22:00

Profesora: Silvia Martínez
CANTO
22:00 a 23:00

Profesor: Marcos Varela.

Así foi a Noite de Música Tradicional nas Festas do Socorro 2108 en Ouzande

Os  nosos grupos, Retrouso e Recanto participaron na Noite de Música Tradicional das Festas do Socorro convidados pola Xunta Parroquial. Estiveron acompañados dos Xeitosos de Trazo, AC Rosalía de Castro de Cacheiras e o grupo Nai de Santiago de Compostela. Fermosa noite de festa e música que xuntou no campo da festa de Ouzande a un bo número de persoas de todas as idades.

Picando na imaxe poderás ver as mellores fotos do evento.

Noite de música tradicional en Ouzande. Festas do Socorro 2018

NOITE DE MÚSICA TRADICIONAL. OUZANDE-A ESTRADA

FESTAS DO SOCORRO 2018

O programa desta noite de música tradicional será o seguinte:

Día: Venres, 7 de setembro de 2018

Hora: 22:00 h.

Lugar: Campo da Festa de Ouzande.

Haberá posto de polbo e churrasco, así como servizo de bar.

As actuacións dos grupos convidados serán todas elas “a pé de campo”, mesturándose entre o público , tratando así de recuperar o sabor e ambiente das foliadas tradicionais, e procurando a maior participación posible dos asistentes. 

Actuacións Musicais

Os Xeitosos de Trazo (Trazo)

“Os Xeitosos de Trazo” nace por iniciativa municipal no inverno do ano 1979. Comeza como grupo de gaitas e cuns doce membros en total. Unha vez asentados e pasados xa ao redor de dous anos, dan comezo as clases de baile e con iso incorpóranse as primeiras mulleres á agrupación, pasando a ser máis de 30 persoas.

Na actualidade, os integrantes están repartidos nas escolas de baile tradicional, gaita e pandeireta, os cales están divididos segundo as idades destes. Tamén se organizan cursos na propia asociación, como o de acordeón ou de iniciación ao baile tradicional para adultos.

Mostran o seu traballo por toda a comunidade autónoma galega e nestes últimos anos vimos desenvolvendo actuacións tamén fóra de Galicia e mesmo no estranxeiro. Así mesmo, no ano 2009 asistiron ao Festival Intercéltico Beltaine (en Avilés), e ao Festival Intercéltico de Saint Loup (en Francia). Participamos tamén en numerosos concursos de baile tradicional e de pandereteiras, conseguindo varios premios en distintas categorías.

Anualmente realizan un festival no seu concello, ao cal invitan a grupos cos que fan intercambios polo resto do país e Portugal.

Grupo de gaitas da AC Rosalía de Castro (Cacheiras-Teo)

Asociación Fundada no ano 1980. O grupo de gaiteiros e pandereteiras conta no seu haber coa obtención, entre outros, dos seguintes premios:

Concurso de cuartetos organizado pola Asociación Folklórica Cantigas e Agarimos: 1º premio nos anos 1990 e 1992, e 2º premio en 1991.

Concurso de cuartetos tradicionais organizado pola Agrupación Folklórica Rosalía de Castro de Padrón: 2º premio en 1996 e 1º nos anos 1997 e 1998.

         Concurso “Ricardo Portela” organizado polo concello de Pontevedra: 3º premio e premio especial á mellor interpretación en toque pechado, na edición de 2001.

         Concurso de Música Tradicional da A. X. Xacarandaina (A Coruña): 1º premio en 1999, 3º en 2000 e 2º en 2001.

         Concurso “Alalá” da A. F. C. Santa Cruz de Ribadulla (Vedra): 1º premio en 2001.

Concurso organizado pola A. X. Xalgarete (Vigo): 2º premio na VIII edición, ano 2002.

Grupo Nai (Santiago)

O grupo NAI xorde no 2014 coa intención de homenaxear á muller en calquera das súas facetas e tamén as súas emocións e os seus sentimentos. Con este propósito cantámoslle á falta de liberdade, á dor, ao desamor, á maternidade, ao maltrato, á perda dun amor (...) ben a través da música ou ben a través da poesía.

Os seus compoñentes actuais son:

Marcos Varela.Compositor, arranxos, acordeón, gaita e piano.

Xosé Martíns. Letrista, percusión, gaita e voz.

Patricia Quintela. Acordeón e voz.

Clara Ponce. Clarinete.

Musicalmente nútrense de pezas do repertorio popular galego, do cantautor portugués Zeca Afonso e da música popular do seu país; todos eles arranxados dende o seu punto de vista. Tamén inclúen algunhas composicións de Marcos Varela, compoñente da formación.

Recentemente publicaron o seu primeiro traballo discográfico, co mesmo nome que o grupo: Nai.

Retrouso (Ouzande)

Fundado en Ouzande en 2005. Nestes anos o grupo converteuse nun dos referentes da música tradicional da comarca, participando en festivais como o desaparecido Músicas da Terra, de Ouzande; no Folk de Raíz, de Callobre; as Nosas Músicas de Couso; Coto Manguelo de Orazo, etc. O ano 2012 presentou o seu primeiro disco, OU, de extraordinaria acollida entre os afeccionados da música tradicional. No ano 2016  presentaron o seu segundo disco DOUS, no Teatro Principal da Estrada.

 

Recanto (Ouzande)

Agrupación dunha vintena de veciños e veciñas de Ouzande afeccionados ás cancións tradicionais. Novidosa proposta que xurdiu a raíz das clases de canto tradicional que organiza A Fervenza de Ouzande desde o ano 2012. A agrupación ouzandesa acudiu convidada, ese mesmo ano, ao certame Cantos de Taberna, en Pontevedra, e participou desde aquela en foliadas e certames de cantos de Taberna en Pontecesures, Trazo, Arzúa, A Estrada ou Santo André de Vea.

Así foi a xornada de limpeza na Fervenza de Ouzande

O pasado 18 de agosto xuntámonos para seguir coa conservación e limpeza da contorna dos muíños da Fervenza de Ouzande. Picando na imaxe poderás ver as mellores fotos da xornada, que rematou cunha merenda de confraternidade.

Xornada de Limpeza dos muiños e fervenza de Ouzande

O próximo sábado, 17 de agosto, a AC A Fervenza de Ouzande convoca a todas as persoas interesadas a unha tarde de limpeza e merenda na contorna da Fervenza de Ouzande.

Tomando como encontro o Muíño do Rubio, os participantes teñen que traer os seus utensilios para a limpeza da maleza a partir das 5 da tarde.

Unha vez rematada a mesma, sobre as 8 da tarde, a Asociación convoca a unha merenda de convivencia á que pode asistir quen o desexe, aínda que non participase na limpeza. A merenda é un convite da AC A Fervenza de Ouzande.

ANDANDO CAMIÑOS. AS CAMISETAS DA FERVENZA DE OUZANDE 2018

Volveron as camisetas do verán á Fervenza de Ouzande. Este é o fermoso deseño realizado por Rosa de Cabanas para ti. Podes conseguilas na Taberna de Ouzande, no Bar Panamá e na Perruquería Patxi da Estrada.

RECANTO en Pontecesures

Un ano máis o grupo de canto tradicional de Ouzande, Recanto, participou no Ghaitellón de Ponteceseures, organizado pola AC Xarandeira. Foi o pasado 7 de xullo. Aí quedan imaxes do evento:

Así foi o lumeiro 2018 en Ouzande

Moita animación e festa para celebrar un ano máis a festa do lumeiro. Picando na imaxe poderás ver as mellores fotos do evento.

Lumeiro 18 en Ouzande.

LUMEIRO EN OUZANDE

O próximo 23 de xuño, sábado,  terá lugar o lumeiro no campo da festa de Ouzande. Como todos os anos, darémoslle a benvida ao verán arredor da fogueira. Teremos música e festa e  se queres, podes traer algún instrumento para animar. Teremos á venda pan e chourizos que poderás asar ti mesmo/a nas brasas da fogueira. E ao final saltaremos por riba do lume. Se queres, podes traer algún recipiente para levares a auga de flores para a casa.

Coma sempre, haberá algunha sorpresiña..., onde andará o home do saco? Se aparece, poderemos escribir nun papel o que queiramos queimar con el...

Ah!  Os nenos e as nenas están invitados a vir a partir das 7:30 da tarde... os maiores esperade que chegue a noite...