Bo camiño 2018

COS NOSOS MELLORES DESEXOS

Así foi a Ruta de Nadal 2017

 

 

14 valentes responderon á convocatoria da Fervenza de Ouzande, a pesar das previsións de chuvia que parecían cumprirse cunha mañá desapracible, pero que remataron por respectar aos camiñantes que recorreron os 12 km previstos sen mollarse e nun inmellorable ambiente de camaradería para andar e falar, pasando unha mañá de Nadal diferente. Gozaron de fermosísimas paisaxes de inverno a través dos montes da Somoza e Ouzande e atravesaron lugares con encanto como os de Bargo, Castrorramiro e Carballeira na parroquia da Somoza. Ás  13:15 horas en punto, seguindo o previsto, regresaron á Igrexa de Ouzande. Xa outra vez con fame.

 

Picando na imaxe poderás ver as mellores fotos da Ruta:

 

 

Feliz RUTA DE NADAL EN OUZANDE. 2017

ATRÉVESTE?

 

 EN NADAL TAMÉN IMOS ANDAR

O próximo luns 25 de decembro, a AC A Fervenza de Ouzande inicia o co seu programa de Actividades do Inverno coa convocatoria da OITAVA edición da Ruta de Nadal. Nesta ocasión escolleuse a Ruta a Castrorramiro (A Somoza).

A Asociación convida a pasar a mañá do día de Nadal dun xeito diferente. Disfrutaremos da paisaxe, da natureza e da conversa amigable, e seguro que tamén para alixeirar a copiosa cea de Noiteboa. A actividade é gratuíta.

Hora de saída: 10:15, diante da Igrexa de Ouzande. Chegada sobre as 13:15 ao mesmo sitio.

11 km de percorrido, dificultade baixa.

Recoméndase levar calzado cómodo e impermeable.

A ruta só se suspenderá se as condicións metereolóxicas impiden a súa realización.

LUGARES DE INTERESE: no noso percorrido habémonos atopar cos seguintes puntos de interese: 

- No transcurso da ruta atravesaremos varias masas de bosque autóctono con abundantes carballeiras, castiñeiros, acivros, e vexetación de ribeira, á beira dos numerosos regatos que cruzaremos no percorrido.

-Lugar de Castrorramiro. Fermoso lugar da parroquia da Somoza, que conserva numerosas costrucións tradicionais e a estrutura de pequeno nucleo rural con ruelas e fermosos recunchos.

-Pozo da Freixa ou Fírvida. Contorna con muíños e unha fervenza, ademais dun pozo de considarables dimensións para facer un descanso.

Cea de Nadal

Xa é tradición ir cear ao Xarro de Aguións arredor das datas do Nadal. Boa festa e boa compaña, cos nosos amigos dos Regatos. Así foi a cea das clases de música da Fervenza de Ouzande do pasado 15 dde decembro. Para ver máis fotos, pica na imaxe:

RECANTO EN ARÍNS

O pasado 25 de novembro fomos cantar a Aríns, ao seu IV Serán. Tamén estaba prevista a actuación de Retrouso, que non puido poarticipar no evento, sendo substituídos polos nosos amigos e amigas do grupo Nai. Gran festa con todas estas formacións:

Picando nesta imaxe podes ver as mellores fotos do evento:

Xornada de formación e reflexión da Directiva da Asociación

Onte domingo 19 de novembro tivo lugar unha xornada de formación, reflexión e análise da situación asociativa da AC A Fervenza de Ouzande. Esta xornada estaba destinada a Xunta Directiva da Asociación e tiña como obxectivo facer unha descrición da situación actual do colectivo de Ouzande así como analizar as perspectivas de traballo futuro da mesma. Despois de 16 anos de traballo asociativo ininterrompido, a Xunta Directiva considerou  necesario facer unha reflexión sobre o realizado ata agora, así como o futuro próximo da entidade, tratando de que esta continúe contribuíndo ao desenvolvemento cultural e sociocomunitario da parroquia. 

Para garantir a calidade do debate e da análise dos contidos citados contouse coa colaboración dun dos mellores coñecedores do ámbito no que traballamos, o Técnico de Animación Cultural no Concello de Vedra e Educador social, Iván García García, tamén profesor na Falcultade de Ciencias da Educación.

A xornada tivo lugar no albergue de Sabucedo e prolongouse durante todo o domingo. Os dez asistentes da directiva compartiron o xantar no propio albergue.

O encontro resultou enormemente enriquecedor, e a través de diferentes dinámicas propostas polo ponente, fíxose un repaso pola historia asociativa da Fervenza, e as súas potencialidades cara ao futuro, pero tamén se reflexionou sobre a importancia de conceptos como a participación de calidade, planificación e organnización, democracia cultural, etc.

 

O relator tamén expuxo un resume de boas prácticas asociativas baseado na experiencia do Concello de Vedra, que con 12 parroquias e 5000 habitantes conta con perto de 80 asociacións en activo.

Os participantes aproveitaron para gozar da riqueza patrimonial e paisaxística de Sabucedo, realizando un percorrido pola parroquia e a contorna dos muíños da mesma.

Picando na imaxe podes acceder a máis fotos do encontro:

 

As imaxes da Festa Doutono 17

Noite animada a do pasado 4 de novembro en Ouzande. Un bo número de persoas achegouse ao campo da festa a celebrar a Festa de Outono. Castañas, chourizos, viño novo, doces de outono e moita música e festa. Estiveron con nós as Carabuñeiras de Vea. Pasámolo moi ben.

Pica na imaxe para ver todas as fotos do evento:

Festa DOUTONO en Ouzande.

A Asociación continúa co seu programa DE OUTONO, coa celebración da Festa de Outono que terá lugar o próximo sábado 4 de novembro de 2017.

A partir das 20:30 da noite no Campo da Festa de Ouzande celebramos a festa das castañas en Ouzande.

Haberá castañas asadas e viño novo, de balde para todos os asistentes.

Este ano volveremos ter novidades gastronómicas interesantes para facer unha festa máis doce para todos:

-Degustación de pasteis e doces elaborados con castañas  e produtos do outono cociñados por socios e socias. 

SE TI QUERES, PODES TAMÉN TRAER O DOCE FEITO POR TI E COMPARTILO.

-Tamén teremos un servizo de bar con chourizos asados a prezo módico para completar a festa.

Non faltará a música cos compoñentes de RETROUSO,  e co grupo de cancións RECANTO.

Nesta ocasión contaremos coa participación musical do grupo de S. André de Vea, AS CARABUÑEIRAS DE VEA.

As imaxes da Ruta Doutono en Ouzande. 2017

Ruta dos Montes da Somoza e Ferreiros

Domingo 29 de outubro de 20017.
Un total de 40 persoas de todas as idades e chegadas da parroquia de Ouzande e de diversos lugares da contorna cumpriron co percorrido previsto. Foron recibidos por unha mañá luminosa e de agradable temperatura que permitiu realizar o traxecto de xeito pracenteiro. Os camiñantes gozaron da paisaxe e da conversa nas máis de tres horas de paseo. Quedaron citados para a proxima ruta da Fervenza, que será a do 25 do mes próximo, día de Nadal.

Se picas na imaxe poderas ver as mellores fotos da ruta:

Ruta de Outono en Ouzande

Despois de dous anos, recuperamos as rutas de Outono. Nesta ocasión realizarmos a Ruta dos MONTES DA SOMOZA E FERREIROS.

Terá lugar o próximo domingo 29 de outubro e nela poden participar todas as persoas interesadas. Trátase dunha actividade gratuíta e a iscrición realizarase no momento da partida.

Hora de saída: 10:00, diante da igrexa de Ouzande. Chegada sobre as 13:30 ao mesmo sitio.

11 km de percorrido, dificultade baixa.

Recoméndase levar calzado cómodo e impermeable.

A ruta só se suspenderá se as condicións metereolóxicas impiden a súa realización.

LUGARES DE INTERESE: no noso percorrido habémonos atopar cos seguintes puntos de interese: 

-Aldea de Ferreiros. Pertence ao concello de Cuntis, aínda que historicamente sempre existiu unha grande relación entre os seus habitantes e os veciños de Ouzande. 

-Congostra dos lobos. Para chegar a Ferreiros utilizaremos antigas sendas que eran utilizadas polos veciños de ambas parroquias, e sobre as que aínda hoxe se escoitan moitas historias de lobos.

-Fervenza e muíños de Ouzande. Contorno de 7 muíños e un pozo. É unha zona de especial beleza pola vexetación que conserva numerosas especies autóctonas (varias carballeiras, bosque de acivros, vexetación dos cursos fluviais, salgueiros, ameneiros...). 

-No transcurso da ruta atravesaremos varias masas de bosque autóctono con abundantes carballeiras, castiñeiros, acivros, e vexetación de ribeira, á beira dos numerosos regatos que cruzaremos no percorrido.

Recanto e as gaiteiras da Fervenza de Ouzande na Fuliada de Santo André de Vea.

O pasado sábado, 21 de outubro, o grupo Recanto, acompañado das gaiteiras da Fervenza de Ouzande, participaron na Foliada de Santo André de Vea, que organizan magnificamente as Mulleres Rurais da parroquia. Moita música, castañas, e chocolate para quecer a noite. Aí quedan algunhas imaxes. Todas picando AQUÍ.

Inicio das Xuntanzas para Tecer.

O pasado 9 de outubro comezaron as Xuntanzas para Tecer. Podes achegarte calquera luns de 8 a 10 da noite no local de Ouzande. Aí quedan as imaxes:

As clases da Fervenza de Ouzande en marcha, curso 2017-18

Aí quedan as imaxes do inicio das clases deste curso. Aínda queda sitio para ti. Deixamos tamén o horario semanal. Picando na foto poderás ver as mellores imaxes das clases.

Horario

VOLVEN AS XUNTANZAS PARA TECER

SEGUIMOS TECENDO.

Por terceiro ano consecutivo a Asociación leva adiante esta iniciativa, que tivo as súas orixes nun curso de tear realizado en 2014. 

No curso 15-16 o curso reconverteuse, por iniciativa das participantes nunhas XUNTANZAS PARA TECER, no que as participantes se reunían semanalmente para tecer aprendendo unhas das outras. 

Despois do éxito destas xuntanzas, convocamos a todas as persoas interesadas a poñer de novo en marcha as XUNTANZAS PARA TECER. Será o próximo luns día 9 de outubro, ás 8 da tarde no Local do Campo da Festa de Ouzande. 

Nesta primeira reunión poñerémonos de acordo para organizarnos e comezar a tecer. Tear, ganchillo, calceta.... Pode escollerse calquera modalidade ou material, como a la ou o trapillo. O caso é facelo en compañía e aprendendo unhas das outras. Compartindo o que sabemos, compartindo contos e pasando o tempo xuntos e xuntas.

As xuntanzas serán todos os luns ás 8 da tarde no Local do Campo da Festa.

Pode participar quen queira, homes, mulleres, mozos e mozas. A actividade é gratuíta.

O tríptico cos horarios das clases. Curso 2017-2018

Comezarán todas o sábado 30 de setembro, AGÁS A DE CANTO QUE COMEZARÁ O SÁBADO 7 DE OUTUBRO

Bailas? Clases de Música, canto e baile tradicional en Ouzande. Curso 2016-17

Dan comezo as clases deste novo curso. Un ano máis, a Asociación ofrece a todas as persoas interesadas as diferentes disciplinas destas clases que comezaron alá polo ano 2002. Serán: Acordeón, gaita, percusión, pandeireta, baile e canto tradicional.

As clases darán comezo o próximo 30 de setembro, e terán lugar todos os sábados nos horarios que se informan.

As persoas interesadas poden solicitar información ou inscribirse no correo electrónico da asociación: carreirosouzande@gmail.com, na páxina do facebook A Fervenza de Ouzande ou no blog www.carreiros.blogspot.com.

Tamén se poden inscribir asistindo no horario que se indica a partir do próximo sábado 30 de setembro.

TODOS OS SÁBADOS

ACORDEÓN 10:30 a 11:30 Profesor: Marcos Varela.

GAITA (Iniciación) 11:30 a 12:45 Profesor: Marcos Varela.

GAITA (Perfeccionamento) 12:45 a 13:45 Profesor: Marcos Varela.

TAMBORIL (Iniciación) 10:30 a 11:30 Profesor: Xosé Martíns, Fofi

TAMBORIL (Perfeccionamento) 11:30 a 12:30 Profesor: Xosé Martíns, Fofi

PANDEIRETA (Iniciación) 17:30 a 19:00 Profesora: Silvia Martínez

PANDEIRETA (Perfeccionamento) 18:30 a 20:00

Profesora: Silvia Martínez

BAILE 20:30 a 22:00 Profesora: Silvia Martínez

CANTO 22:00 a 23:00 Profesor: Marcos Varela. (Comezo o 7 de outubro)

As imaxes da limpeza dos muíños da Fervenza 2017

Fomos pasar a tarde no muíño, o pasado 5 de agosto. Traballamos e merendamos. Aí quedan as imaxes: