Fin de ano 2013 no local

Aí o ven

Imaxes da IV Ruta de Nadal 2013

Ao final, a pesar dos precedentes e das previsións metereolóxicas puido realizarse a IV Ruta de Nadal da Fervenza de Ouzande,  xa que unha ducia de valentes responderon á convocatoria da asociación. Os  participantes non so cumpriron o programa previsto, senón que o fixeron con sobrado bo humor e con gañas de poñerlle boa cara ao temporal, que nalgún intre se fixo presente en forma de chuvia e sarabia. Pasadas as 13 horas os sendeiristas regresaban ao punto de partida sen percance e sen ningunha incidencia negativa agás ter que sortear algunhas árbores derrubadas pola borrasca do día anterior e que atrancaban os camiños.

Resúmese nas palabras dunha participante, que ao chegar solicitaba en ton humorístico o "carné de valente", que seica se repartía....

Aí quedan as mellores imaxes da xornada

Recanto canta ao Nadal 2013

Pois iso, que non falte a música... Boas festas para todos e todas. Que o disfrutedes

IV feliz ruta de nadal 2013

atréveste?

Un ano máis imos andar o día 25 de decembro. 

Se queres, este é o plan: 

Roteiro Ouzande-Ferreiros-A Somoza Percorrido: 10 km 

Saída e chegada: Igrexa de Ouzande. 10:30 a 13:30.

Dificultade baixa.

 Recoméndase levar calzado cómodo, e ter en conta as previsións metereolóxicas.

LUGARES DE INTERESE: no noso percorrido habémonos atopar cos seguintes puntos de interese: 

-Aldea de Ferreiros. Pertence ao concello de Cuntis, aínda que históricamente sempre existiu unha grande relación entre os seus habitantes e os veciños de Ouzande. 

-Congostra dos lobos. Saíndo de Ferreiros utilizaremos antigas sendas que eran utilizadas polos veciños de ambas parroquias, e sobre as que aínda hoxe se escoitan moitas historias de lobos. Encamiñaremos á Somoza. 

-Lugar de Bargo. Fermoso lugar da parroquia da Somoza, que atravesaremos para retornar de novo os carreiros do monte desta parroquia. Rodeado de mestas carballeiras e terras de labradío. 

-Fervenza e muíños de Ouzande. Contorno de 7 muiños e un pozo. É unha zona de especial beleza pola vexetación que conserva numerosas especies autóctonas (varias carballeiras, bosque de acivros, vexetación dos cursos fluviais, salgueiros, ameneiros...). Percorrerémola na parte final do recorrido.

as mellores imaxes da festa doutono 2013

O pasado 16 de novembro tivo lugar no local de Ouzande unha animada Festa de Outono. Na mesma participaron ducias de persoas que puideron degustar as ricas castañas asadas, chourizos e viño novo. Tamén probaron os ricos doces que máis de 15 socias e socios realizaron a base de castañas.
A festa completouse coas actuacións musicais do grupo de pandereteiras da asociación, do grupo de cancións Recanto, e con Retrouso, que fixeron as delicias dos asistentes. Aí quedan as mellores fotografías:

festa doutono 2013

Sábado 16 de novembro. A partir das 9 da noite no Campo da Festa de Ouzande

Celebramos a festa das castañas en Ouzande. Haberá castañas asadas e viño novo, de balde para todos os asistentes.

Este ano volveremos ter novidades gastronómicas interesantes para facer unha festa máis doce para todos:

-Degustación de pasteis e doces elaborados con castañas cociñados por socios e socias. SE TI QUERES FACER O TEU DOCE TAMÉN O PODES FACER E COMPARTILO....

Tamén teremos un servizo de bar con chourizos asados a prezo módico para completar a festa.

Non faltará a música cos compoñentes de RETROUSO, co grupo de pandeireteiras da Asociación e co grupo de cancións RECANTO.

ANÍMATE E PARTICIPA NA FESTA

imaxes da ruta doutono 2013

O pasado 12 de outubro, unha vintena de persoas partiron puntuais da igrexa de Ouzande respondendo á convocatoria da Fervenza de Ouzande, para percorrer os 14 km de roteiro que levaron aos camiñantes ao Castro de Arcos, desde o que puideron gozar de fermosas vistas panormámicas. O regreso, puntual tamén, levou aos participantes de novo ao adro de Ouzande despois de disfrutar do contorno da fervenza e muíños de Ouzande, os fermosos camiños dos montes da parroquia, a congostra dos lobos camiño do lugar de Ferreiros, no veciño concello de Cuntis, e a parada para refrescarse na Fonte do Redondo de Ouzande. Como sempre nun gran ambiente de compañeirismo e conversa, os participantes quedaron citados para a próxima ruta que organizará a asociación o próximo día de Nadal no mes de decembro.
Aí quedan as mellores imaxes da xornada
 

ruta doutono 2013

En outono tamén imos andar

O próximo sábado 12 de outubro, a AC A Fervenza de Ouzande continuará co seu programa de Actividades do Outono coa convocatoria da I Ruta do Outono. Percorreremos o Roteiro do Castro de Arcos. Son 11 km de percorrido que inclúen a subida ao castro de Arcos, que nos ofrece unhas magníficas vistas panorámicas e o paso polo lugar de Ferreiros, no veciño concello de Cuntis. Na actividade poden participar todas as persoas que o desexen e é gratuíta. Recoméndase levar calzado cómodo e impermeable.

Hora de saída: 10:00, diante da igrexa de Ouzande. Chegada sobre as 13:30 ao mesmo sitio.

LUGARES DE INTERESE: no noso percorrido habémonos atopar cos seguintes puntos de interese:

- Fervenza e muíños de Ouzande. Contorno de 7 muiños e un pozo. É unha zona de especial beleza pola vexetación que conserva numerosas especies autóctonas (varias carballeiras, bosque de acevos, vexetación dos cursos fluviais, salgueiros, ameneiros...).

-Castro de Arcos. Fermoso promontorio, coas trazas de castro, pero que está sen escavar. Desde o alto. obsérvanse fermosas panorámicas do Val da Anllada e do monte Xesteiras. Recoméndase levar prismáticos, pois mesmo se chega a ver a Ría desde o alto.

-Aldea de Ferreiros. Pertence ao concello de Cuntis, aínda que históricamente sempre existiu unha grande relación entre os seus habitantes e os veciños de Ouzande.

-Camiño dos lobos. Para chegarmos á aldea de Ferreiros utilizaremos antigas sendas que eran utilizadas polos veciños de ambas parroquias, e sobre as que aínda hoxe se escoitan moitas historias de lobos.

- Fonte do Redondo. Xa de volta faremos unha parada no fermoso contorno da Fonte do Redondo, en Ouzande, onde a auga abrolla directamente desde o chan.

HORARIOS CLASES DE MÚSICA E BAILE 2013-2014

 BAILAS?

AÍNDA QUEDAN PRAZAS LIBRES. 

NECESITAMOS BAILADORES E BAILADORAS PARA PODER FACER A CLASE DE BAILE!!

Anímate e participa.

Achégate este sábado, ao local social de Ouzande, nos horarios indicados, e na clase que che interese.

Acordeón: 10:30 horas

Gaita iniciación: 11:30 horas

Gaita perfeccionamento: 12:30 horas

Tambor: 11:30 horas

Pandeireta: 16:30 horas

Cancións tradicionais: 22:00 horas

Baile: sen definir, será o sabado pola tarde/noite. Se estás interesado neste clase achégate este sábado día 5 ao local de Ouzande as 16:30 horas.
Inscríbete enviando un correo a: carreirosouzande@gmail.com


Aí queda unha imaxe da reunión de presentación dos cursos. Sempre o pasamos ben!!!

BAILAS? CLASES DE MÚSICA E BAILE TRADICIONAL EN OUZANDE 2013-14

Dan comezo as clases deste novo curso. A Asociación convoca a todas as persoas interesadas a unha reunión de presentación do curso que terá lugar o próximo sábado 28 de setembro no local social de Ouzande ás 4 e media da tarde. 

Os cursos que poñeremos en marcha serán: 

- Gaita 

- Pandeireta 

- Tamboril 

- Baile 

- Acordeón 

- Cancións tradicionais 

  Na reunión informarase dos prezos e demais detalles das clases e tamén se fixarán os horarios de PANDEIRETA, BAILE que terán lugar os sábados pola tarde, e das clases de ACORDEÓN, GAITA E TAMBORIL, que se celebrarán os sábados pola mañá. TAMÉN SE INFORMARÁ DO HORARIO DO GRUPO DE CANCIÓNS TRADICIONAIS, que se celebrará os sábados pola noite. 

No curso pasado, foron máis de sesenta as persoas matriculadas nestas especialidades musicais, de todas as idades. 

Tamén convidamos ás persoas participantes nas diferentes clases e a todas as interesadas a traeren os seus instrumentos para interpretaren algunha peza e facer algo de festa. Para rematar a reunión a Asociación convida a uns pinchos de merenda. As persoas interesadas poden inscribirse na reunión ou a traves do correo carreirosouzande@gmail.com. Tamén na Taberna de Ouzande (986570285)

Fotos de DISFUNCIÓN CONTINUA en Ouzande

O pasado 8 de setembro, o grupo de teatro estradense, DISFUNCIÓN CONTÍNUA, puxo en escena a obra ERAN OUTROS TEMPOS, OU NON?. A obra representouse no campo da festa baixo unha carpa ateigada de público que premiou a actuación cunha prolongada ovación. Pechábanse así as Festas do Socorro 2013 en Ouzande.

A VI FERVENZA DE MÚSICAS EN IMAXES

Estupenda noite de festa con OS KE HAI, O GHUSTO DO BOI, XURUMELO, RETROUSO E RECANTO, cun aplaudido debut diante dos seus veciños e veciñas.
Aí quedan as mellores fotos

DISFUNCIÓN CONTINUA NAS FESTAS DE OUZANDE 2013

O domingo 8 de setembro, A Fervenza de Ouzande programa un espectáculo teatral para poñer remate ás festas do Socorro 2013, organizadas pola Xunta Parroquial.

Trátase da comedia ERAN OUTROS TEMPOS, OU NON?, da compañía Disfunción Continua da Estrada. Nesta obra, un grupo de mulleres botan a vista atrás para rememorar aqueles tempos nos que compartían pupitre. A acción ubícase nunha escola franquista de 1957 e recréanse as clases de matemáticas, relixión, educación física, formación do espírito "nacional", labores ou economía doméstica e trata de mostrar como se inculcaban valores coma o autoritarismo, conformismo, submisión, familia patriarcal, pobreza, machismo... Uns valores que animan a reflexionar sobre a educación actual. 

A compañía fundada en 2012, xa representou unha obra titulada "Cóncavo Convexo" e agora prepararon este novo espectáculo que está dirixido por Jouse García e que amplía o elenco con actores da Estrada e Vedra: Sabela Magariños, María Porto, Clara Iglesias, Alejandro Picallo, María Gaiteiro, Manu Mougán, Natalia Carbajal e Manuel Rosende.  

A obra foi estreada dentro da XII edición do festival "Móstra(te)” o pasado 26 de xullo en Salvaterra do Miño.

A representación terá lugar no Campo da Festa de Ouzande, ás 20:00 horas. A entrada será de balde, e a obra é apta para todos os públicos.

A Asociación agradece a colaboración do Concello da Estrada para a realización da actividade.

FERVENZA DE MÚSICAS 2013 EN OUZANDE

FERVENZA DE MÚSICAS
VI FOLIADA DE MÚSICA TRADICIONAL. OUZANDE-A ESTRADA

O programa desta VI Foliada será o seguinte:
Día: Venres, 6 de setembro de 2013
Hora: 22:00 h.
Lugar: Campo da Festa de Ouzande.
O campo estará cuberto por unha carpa e haberá posto de polbo e churrasco, así como servizo de bar. Actuacións Musicais:
O Ghusto do Boi (Boqueixón) 
Animada e animosa charanga de música tradicional e popular. Unha ducia de compoñentes, con moito instrumento de vento, percusión e acordeón. Presentes en moreas de festas neste verán.
Os Ke Hai (Callobre) 
Veterana agrupación estradense de música tradicional. O grupo callobrés non falta en ningunha festa, foliada e festival da comarca
Xurumelo (Santiago) 
Trío santiagués que interpreta a música tradicional dun xeito orixinal e atrevido. Acordeóns e voz. Música de moita calidade. Participaron no recente Folk de Raíz de Callobre.
Retrouso (Ouzande)
Grupo anfitrión, fundado en Ouzande en 2005. Nestes anos o grupo converteuse nun dos referentes da música tradicional da comarca, participando en festivais como o desaparecido Músicas da Terra, de Ouzande; no Folk de Raíz, de Callobre; as Nosas Músicas de Couso; Coto Manguelo de Orazo, etc. O pasado ano presentou o seu primeiro disco, OU, de extraordinaria acollida entre os afeccionados da música tradicional.
Recanto (Ouzande) 
Agrupación dunha vintena de veciños e veciñas de Ouzande afeccionados ás cancións tradicionais. Novidosa proposta que xurdiu a raíz das clases de canto tradicional que organiza A Fervenza de Ouzande desde o pasado ano 2012. A agrupación ouzandesa acudiu convidada, este mesmo ano, ao certame Cantos de Taberna, en Pontevedra, o pasado mes de abril.

Ao mesmo tempo convidamos a todos e todas que o desexen a traer os seus instrumentos musicais, para poñer remate á festa como é debido.

imaxes UNHA NOITE NO MUIÑO 2013

O pasado sábado, 17 de agosto, fomos pasar unha noite no muiño do rubio, na Fervenza de Ouzande. Aí quedan as mellores imaxes.

unha noite no muíño 2013

Lugar: Muíño do Rubio na Fervenza de Ouzande.
Hora: 10 da noite.
Motivo: Pasalo ben.
Hai que levar a cea, ganas de festa e, se tés, algún instrumento musical. Imprescindible lanterna para o camiño. Calquera cousa pode acontecer. Se queres, podes ir "vestido/a" para a ocasión.

Éxito do Mago Toño en Ouzande

Aí quedan as mellores imaxes do espectáculo que o Mago Toño nos ofreceu o pasado domingo, como remate ás festas de San Lourenzo na Parrouia. Nunha agradable tarde de verán o artista fixo as delicias de pequenos e maiores, que en máis dun cento, asistiron ao espetáculo.

O Mago Toño volve a Ouzande

O MAGO TOÑO actuará no local social de Ouzande, con motivo da celebración das festas de San Lourenzo na parroquia. A actuación porá remate ás festas o día 11 de agosto a partir das 7 e media da tarde e nela o mago estradense ofrecerá un espectáculo dirixido a público de todas as idades.

Imaxes Lumeiro 2013 en Ouzande

Aí quedan as mellores imaxes do lumeiro deste ano.

fotos ruta ouzande-tabeirós-somoza

Tivo lugar o pasado 8 de xuño. Foi a últimas rutas do programa de primavera IMOS ANDAR, na que participaron unha ducia de persoas, que pecorreron os camiños que unen as parroquias de Ouzande, Tabeirós e A Somoza. Destacou o bo ambiente e a camaradería entre os participantes, así como a visita á igrexa románica de Santiago de Tabeirós, o lugar de Castrorramiro na parroquia da Somoza, e a parada no fermoso contorno da Freixa (fervenza de muiños) desa mesma parroquia. Aí quedan as imaxes:

Lumeiro 2013

UNHA FESTA DIFERENTE
O próximo 23 de xuño, domingo, terá lugar o lumeiro no campo da festa de Ouzande. Como todos os anos, darémoslle a benvida ao verán arredor da fogueira. Faremos festa co grupo Retrouso e, se queres, podes traer algún instrumento para animar. Teremos á venda pan e chourizos que poderás asar ti mesmo/a nas brasas da fogueira. E ao final saltaremos por riba do lume. Se queres, podes traer algún recipiente para levares a auga de flores para a casa. Coma sempre, haberá algunha sorpresiña..., onde andará o home do saco? Se aparece, poderemos escribir nun papel o que queiramos queimar con el... Ah! Os nenos e as nenas están invitados a vir a partir das 6 da tarde... os maiores esperade que chegue a noite...

Fotos Festa Fin de curso 2013

Máis de sesenta persoas participaron na Festa de Fin de curso das Clases de Música tradicional que organiza A Fervenza de Ouzande, que tivo lugar o pasado sábado 15 de xuño. Comezaron compartindo unha merenda de confraternidade, á que seguiu unha velada musical, na que participaron os alumnos e alumnas das clases de gaita, pandeireta, tambor, acordeón e canto tradicional. A Foliada prolongouse ata ben entrada a noite, entre un bo ambiente de todos e todas as participantes. Aí quedan as mellores fotos:

Festa Fin de Curso 2013

Este ano a asociación celebra a FESTA de fin de curso das clases de música e canto tradicionais que se desenvolven todos os sábados no local social de Ouzande. O curso presente supuxo un notable aumento da participación nestas clases, superando as sesenta persoas, de todas as idades, nas disciplinas de: gaita, tambor, pandeireta e acordeón. Destacou tamén o grupo de cancións tradicionais que empezou as clases este curso e que xa conta cun número importante de compoñentes, que xa fixeron algunha actuación, nos Cantos de Taberna de Pontevedra e na Sardiñada de San Antón. Convidámoste entón a unha foliada para o sábado 15 de xuño a partir das 9 da tarde no campo da festa. Convidaremos tamén a uns pinchos a todos os asistentes. (Se queres, podes achegarte a partir das 8 e cuarto para ir preparando todo) Non esquezas traer o teu instrumento musical. Están invitados todos os veciños e veciñas da parroquia e cantos amigos desexen vir.

imaxes excursión ourense romano e urbano 2013

A excursión anual, que cumpría a décimo segunda edición, organizada pola AC A Fervenza de Ouzande tivo lugar este domingo día 2 de xuño. Perto de 50 persoas responderon á convocatoria e desprazáronse á cidade de Ourense, e á Comarca de Bande, a onde foran convocados pola asociación para vivir e revivir o OURENSE URBANO E ROMANO. O tempo despexado e cálido acompañou aos ouzandeses durante toda a xornada en terras ourensás.

A visita á cidade consistiu nun percorrido pola zona histórica, partindo das súas orixes romanas, e percorrendo as súas diferentes rúas e prazas nunha viaxe ata o presente.

Comezaron polas orixes coa visita á Alameda e ás Burgas e o seu Centro de Interpretación. Pasaron polo punto onde se situaba o campamento romano e foron comprobando como se foi conformando urbanísticamente a cidade. Aproveitaron a vista a igrexa de Santa María Nai para coñecer a época xermánica. A plena Idade Media coñecérona a través da percorrido pola Praza Maior ou Praza do Campo. Desda Praza do Trigo, antigo mercado medieval, accederon á Catedral, de orixe románica, comezada a construír en 1157. Puideron comprobar as orixinais singularidades da igrexa barroca de Santa Eufemia. Aproximáronse xa a unha fasquía máis moderna da cidade coa Rúa do Paseo ata a chegada ao parque de San Lázaro, desde onde baixaron, percorrendo o Camiño de Santiago, ata a famosa Ponte Romana ourensá, onde gozaron dunhas magníficas vistas da cidade e do río Miño.

O xantar comunitario celebrouse nas magníficas instalacións da Feira de Ourense, á beira do Rio Miño, e moi perto das termas da Chavasqueira, onde os máis atrevidos aproveitaron para darse un baño.

Despois do merecido descanso dirixíronse á coñecida igrexa de Santa Comba de Bande, con orixes no século VII. Nesta visita os excursionistas puideron gozar dunha magnífica explicación histórica e artística por parte dunha veciña do lugar, que é a encargada do coidado e divulgación desde monumento histórico.

No mesmo concello de Bande, dirixíronse ao Xacemento Arqueolóxico Aquis Querquennis, antigo asentamento do exército romano na chamada Via Nova. Tiveron ocasión de visitar previamente o magnífico Centro de Interpretación do mesmo, da man dunha guía do mesmo. Os veciños e de Ouzande resultaron moi gratamente sorprendidos coa visita “in situ” a este magnífico recurso arqueolóxico e histórico, e tan pouco coñecido na nosa comunidade.

Sen moitas máis incidencias, e cun sorriso nos beizos, despois dun día de convivencia e descubrimento de novas cousas, o autobús puxo rumbo a Ouzande, onde os excursionistas arribaron na hora prevista.

Aí van as mellores imaxes

fotos ruta das letras 2013

VIII RUTA DAS LETRAS.
SUBIDA Á PEDRALBA
ANDAMOS E FALAMOS

A pesar das anunciadas inclemencias meteorolóxicas un grupo de 22 respondeu á convocatoria da Fervenza de Ouzande. A comitiva saiu puntual do adro da Igrexa de Ouzande, para dirixirse aos montes da Somoza. Atravesaron as abas do Pedroso sen maiores incidencias, pero cando acadaban o cumio do monte da Pedralba (634m) foron recibidos por unha boa tormenta, que por momentos chegou a ser de sarabia. A volta permitiu atravesar os fermosos montes da Somoza e Ouzande, que conservan aínda numerosas masas de carballeiras e outras especies autóctonas. O grupo, mollado, pero satisfeito polo obxectivo cumprido, chegou á hora prevista ao punto de regreso. Alí, ademais de recibir o agasallo prometido pola asociación, un libro na nosa lingua(Longa noite de Pedra, de Celso Emilio Ferreiro), foron obsequiados coa lectura dramatizada de textos de Roberto Vidal Bolaño, a cargo de membros da asociación. Un ano máis a Asociación cumpriu os obxectivos da actividade: ANDAMOS, FALAMOS E LEVAMOS UN LIBRO PARA A CASA.

AÍ QUEDAN AS MELLORES IMAXES

Ruta Ouzande-Tabeirós-A Somoza

Rematamos o programa IMOS ANDAR de camiñadas a pé na primavera.
O próximo domingo, 9 de xuño realizaremos a Ruta a Tabeirós e a Somoza.
Hora de saida e chegada: 10:00/13:30 Igrexa de Ouzande
Percorrido: 12 km.
Dificultade: baixa.

Puntos de Interese:

-Igrexas Románicas: Igrexa de Ouzande e de Santiago de Tabeirós.

-Contornos rurais: O Formigueiro en Ouzande, As Quintas en Tabeirós; e especialmente Castrorramiro na Somoza, lugar que conserva numerosas edificacións tradicionais, así como a estrutura histórica da aldea.

-Contornos naturais: Agros de Ouzande, numerosas masas de flora autóctona, especialmente carballeiras. 

Pozo da Freixa na Somoza: contorno de muiños e unha fervenza de extraordinaria beleza.

VIII Ruta das Letras Ouzande 2013

VIII Ruta das Letras
Subida á Pedralba

O próximo venres 17 de maio, terá lugar a oitava edición da Ruta das Letras, organizada pola Asociación.
Saída/Chegada: 9:30 / 13:30 Igrexa de Ouzande
Percorrido: 16 km
TODAS AS PERSOAS PARTICIPANTES SERÁN AGASALLADAS CUN LIBRO EN GALEGO, CORTESÍA DA ASOCIACIÓN, EN CONMEMORACIÓN DO DIA DAS NOSAS LETRAS.
A actividade é gratuíta e poden participar todas as persoas que o desexen, socias ou non socias.

Recoméndase levar calzado resistente, debido ás condicións do camiño, así como uns prismáticos.

LUGARES DE INTERESE:

- Montes do Pedroso e A Pedralba (A Somoza): posto que albergan numerosas especies autóctonas que sobreviviron as reforestacións masivas de coníferas, especialmente de piñeiros e eucaliptos. É unha zona de especial beleza pola vexetación que conserva numerosas especies autóctonas (varias carballeiras, bosque de acivros, vexetación dos cursos fluviais, salgueiros, ameneiros...).

- Monte Cabalar: A rota discorre en parte a través das parcelas incluídas no coñecido proxecto “Monte cabalar”, o que nos permitirá disfrutar do excelente estado en que sen conserva o monte, así como contemplar os rabaños de cabras e mandas de cabalos e vacas en liberdade.

- Vistas panorámicas: fermosas vistas paisaxísticas cara ao val do río Liñares co monte da Rocha ao fondo. Tamén se divisa neste percorrido a vila da Estrada desde numerosas perspectivas, así como a cidade de Compostela, o val do río Ulla, Pico Sacro, montes da Somoza... O alto da Pedralba, obxectivo da ruta, sitúase a 634 m de altitude, e permitirá gozar aos camiñantes de vistas como as indicadas, e mesmo, en caso de boa visibilidade, da contemplación das Rías de Arousa e Pontevedra.

imaxes ruta dos carreiros de ouzande 2013

O pasado primeiro de maio andamos e falamos polos carreiros de Ouzande. Aí quedan as fotos.

IMOS ANDAR. Roteiro polos carreiros de Ouzande 2013

Un ano máis, coa chegada da primavera, a AC A Fervenza de Ouzande inicia o seu programa de rutas a pé, IMOS ANDAR. O próximo mércores, 1 de maio terá lugar a primeira.

RUTA DOS CARREIROS DE OUZANDE

Mercores 1 de maio de 2013

DATOS DA RUTA

ACCESOS: Hai que sair da igrexa de Ouzande (A Estrada), situada a 1000 m do centro urbano da vila en dirección sur; rúa Pérez Viondi e travesía de Ouzande (sinalizada). A igrexa está a man esquerda.

PUNTO DE PARTIDA / CHEGADA: A citada igrexa, é unha ruta circular, alí hai sitio para estacionar os turismos.

SAÍDA: 10:00

REGRESO: 13:00h

PERCORRIDO: 10 quilómetros, atravesando os diferentes lugares de Ounzande (O Formigueiro, Alemparte, O Redondo, O Picoto, O Castro e O Tallo) polos antigos carreiros e camiños, reparando en diferentes puntos de interese como fontes, lavadoiros e antigas calzadas. Unha parte do roteiro cruzará o monte de Ouzande, con numerosas carballeiras e pequenos bosques de acivros. Tamén percorreremos un tramo da Ruta da Fervenza e muiños de Ouzande.

DIFICULTADE: baixa

DURACIÓN: 3h

MATERIAL: levar roupa cómoda (chándal, botas de montaña...) e ter en conta a predicción metereolóxica.

PUNTOS DE INTERESE: no noso percorrido habémonos atopar cos seguintes puntos de interese:

-igrexa de Ouzande: É de estilo orixinalmente románico, conserva elementos da época coma os canzorros que son únicos na zona ao representaren pecados condenados pola Igrexa. Tamén destaca o seu arco central, o agnus dei, o retablo barroco do Carme...

-cruceiros: hai dous que están nas inmediacións da igrexa, un deles é dos máis antigos da zona, foi recollido por Castelao en As Cruces de Pedra da Galiza.

-muíños da Fervenza: conxunto formado por sete muíños distribuidos en pouco máis de cincocentos metros, o máis antigo data do S.XVIII. É unha zona de especial beleza pola vexetación que conserva numerosas especies autóutonas (varias carballeiras, bosque de acivros, vexetación do curso fluvial do regueiro da Fervenza, salgueiros, ameneiros...). Destaca a orografía que crea neste punto a famosa Fervenza, aínda que son numerosos os cachóns ou pichos, ao longo desta parte de percorrido fluvial na nosa ruta.

-vistas panorámicas: fermosas vistas paisaxísticas cara ao val do río Liñares co monte da Rocha ao fondo. Tamén se divisa neste percorrido a vila da Estrada desde numerosas perspectivas, así como a cidade de Compostela, o val do río Ulla, Pico Sacro, montes da Somoza, Torres de Guimarei...

Suspendido pola chuvia o Roteiro Teatral

O Roteiro Teatral organizado pola Aula de Teatro do IES Losada Diéguez da Estrada, prevista para o pasado sábado día 27 de abril, tivo que ser suspendido por causa dos chuvascos primaverais caídos sobre a parroquia, que obrigaron aos centos de asistentes a refuxiarxe nas instalacións educativas do Instituto estradense.

Roteiro teatral na Fervenza de Ouzande

Os alumnos e alumnas da Aula de Teatro do IES Losada Diéguez da Estrada realizarán un Roteiro Teatral partindo da Igrexa de Ouzande cara os muíños da Fervenza. A actividade terá lugar o próximo sábado día 27 de abril ás 12:00 horas. A AC A Fervenza de Ouzande colabora co Instituto na organización da actividade. Convidamos a todos os veciños e veciñas, especialmente aos máis pequenos da casa a participar nesta actividade, debido ao seu interese e orixinalidade. En palabras dos organizadores:

Ao longo do roteiro teatral os actores e actrices a través do xogo achegarán aos espectadores/-as a maxia, a ledicia e a fantasía que proporciona o teatro nun entorno natural máxico.

Este espectáculo mergullará ao público nun heteroxéneo universo de situacións cun elevado grao de fantasía, humor e reflexión. Nesta función realizarase unha férrea defensa da natureza, que procura o coidado, a conservación e o respecto do medio ambiente. 

A partir das 14 horas os máis de 200 asistentes que se prevé participen na actividade farán o xantar no adro da igrexa de Ouzande. Proceden de Touro, Laxe, Palas de Rei e A Estrada. Máis info aquí.

Aí quedan unhas imaxes dos ensaios celebrados a semana pasada no contorno dos muiños.

horarios musicoterapia para maiores

O pasado sábado, 20 de abril, tivo lugar a presentación das sesións de Musicoterapia en Ouzande para persoas maiores, que tivo unha notable resposta dos socios e socias. Fixouse o seguinte calendario e horarios definitivos:

Xoves 25 de abril
Xoves 2 de maio
Xoves 9 de maio
Todos estes días a partir das 7 da tarde no Local Social de Ouzande.
Aínda podes participar. Quedan prazas libres.

Aí quedan unhas imaxes da presentación

musicoterapia para maiores

Da comezo o programa de actividades de primavera da AC A Fervenza de Ouzande cun obradoiro de Musicoterapia dirixido a persoas maiores. Ten como obxectivo a mellora de capacidades e habilidades como: memoria, linguaxe, atención, orientación, comunicación, equilibrio, coordinación, flexibilidade..., a si como o traballo na mellora do estado de ánimo, autoestima, etc. Todo isto, partido do traballo coa música, e actividades relacionadas coa mesma. O curso estará impartido por Natalia Carbajal Porto, veciña de Ouzande, membro da directiva da asociación e musicoterapeuta.
A Asociación convoca unha reunión informativa para o próximo sábado 20 de abril, ás 21:30 horas. Na mesma informarase de todos os detalles e contidos da actividade, así como das datas e horario.

RETROUSO nos SERÁNS EN COMPOSTELA 2013

Aí quedan as imaxes da actuación de Retrouso de Ouzande nunha animada foliada nos Seráns en Compostela, en A Nave de Vidán. Foi o pasado 14 de abril

Retrouso nos Seráns de Compostela

O grupo RETROUSO  actúa este xoves día 14 de marzo nunha nova edición dos Seráns en Compostela.
O programa é o seguinte:

21h30 . Obradoiro de baile con Eva Barona (Ultreia)
22h30 . Retrouso de Ouzande
23h15 . Ultreia
24h00 . O Ghusto do Boi
01h00 . Foliada até que o corpo aguante!

Os Seráns celébranse en A NAVE DE VIDÁN ( Avenida Mestra Victoria Míguez, nº 44, 15706 Santiago de Compostela) 

Como chegar: AQUÍ 

imaxes antroido ouzande euroveigas 2013

aí quedan as mellores imaxes do antroido EUROVEIGAS 2013



e estas son as coplas que cantaron as cegas

ANTROIDO 2013 EUROVEIGAS EN OUZANDE

ANTROIDO 2013 EN OUZANDE 

EUROVEIGAS INAUGÚRASE EN OUZANDE 

Sábado 9 de febreiro 2013 A partir das 16:30 da tarde concentración de disfraces no Campo da Festa. A continuación, o escenario-tractor do casino EUROVEIGAS percorrerá os lugares da parroquia anunciando a inauguración do CASINO. O CASINO EUROVEIGAS ofrecerá diversos xogos a todos os participantes: ruteta da parcelaria, bingo das leiras, poker de fincas, e mesmo capela de casamentos da VEIGA. Teremos de todo: cabareteiras, matóns, crupiers, vaqueiros de medio pelo, e todo tipo de mangantes. Non faltarán as cegas do Antroido que, un ano máis recitarán as súas coplas, que non esquecerán os acontecementos da parroquia nin tampouco a actualidade en xeral. 

Horario aproximado: 

17:00 da tarde: saída do campo 

17:10: O Tallo 

18:00:. O Castro 

18:15: O Picoto e o Redondo 

18:35: Alemparte e O Formigueiro 

19:00: O Topete 

19:15: Igrexa 

19:30: INUAUGURACIÓN DO CASINO EUROVEIGAS NO LOCAL SOCIAL DO CAMPO DA FESTA.GRAN FESTA DE DISFRACES, CASINO DE XOGOS, E DEGUSTACIÓN DUNHA MERENDA CON PRODUTOS TÍPICOS DA ÉPOCA

Asemblea Anual 2013

 O pasado 20 de xaneiro celebrouse a Xunta Xeral Anual da Asociación. Unhas 50 persoas encheron o local social nunha reunión na que a Directiva presentou o informe de xestión e contas de 2012. Puideron disfrutar das mellores imaxes do ano e da actuación do grupo de cancións tradicionais da asociación. Para rematar, os asistentes degustaron un rico chocolate con rosca, nunha animada xornada de convivencia.

Convocatoria Xunta Xeral Anual

A AC A Fervenza de Ouzande convoca aos socios e socias á súa Xunta Xeral anual, que terá lugar o domingo 20 de xaneiro de 2013 ás 5:30 da tarde no local social do campo da festa de Ouzande. A orde do día será a seguinte:

1. Informe de xestión do ano 2012
Informe de actividades(con proxección de fotografías e vídeos)
Informe económico.
2. Previsión de ingresos e gastos para o ano 2013
3. Programación anual.
4. Rogos e preguntas.

Ao rematar a reunión a asociación convida á merenda con chocolate quente e biscoito.

Imaxes da presentación de INTERIOR CON FROITEIRO E FERIDAS

O pasado 3 de xaneiro tivo lugar a presentación do novo libro de poemas do escritor ouzandés, Manuel Pereira Valcárcel, Interior con froiteiro e feridas. No acto, ademais do autor, participou a filóloga Chuni Canal Covelo e tamén tivemos a ocasión de disfrutar da lectura dun dos poemas por parte da actriz e cantante Maite Dono. O público respondeu moi satisfactoriamente á convocatoria, ateigando o local social de Ouzande.

Presentación do novo libro de Manuel Pereira en Ouzande

PRESENTACIÓN DE INTERIOR CON FROITEIRO E FERIDAS DE MANUEL PEREIRA VALCÁRCEL

O xoves 3 de xaneiro Asociación Cultural A Fervenza de Ouzande A partir das 20:30 horas, no local social de Ouzande (A Estrada), o autor ouzandés Manuel Pereira Valcárcel, residente en Madrid, presentará a súa última obra literaria, o libro de poemas INTERIOR CON FROITEIRO E FERIDAS. No acto participará, presentando o libro co autor, a filóloga Chuni Canal Covelo, que traballou como lectora de galego na Universidade Complutense de Madrid, onde entrou en contacto co escritor ouzandés. Gustaríanos moito contar coa túa presenza neste acto

imaxes findeano 2012

Benvido 2013

imaxes filmou 2012

30.12.12.O FilmOU ofreceuse como unha actividade de resumo, a través de 12 películas documentais, das actividades levadas adiante pola asociación no transcurso do 2012. Ademais presentouse coa fasquía dun Festival de Cinema, con títulos tan suxerentes como: Fachicos de Lume, A lot of pipers, Brave Arcos Mountain, Un conto de Nadal, O penalti máis longo do mundo, etc., que resumían actividades como os Xogos OUlímpicos, rutas de sendeirismo, excursión anual, actividades festivas e musicais..... Concedéronse diversos premios, os globos de prata, como "mellor actriz", "mellor guión adaptado", "mellor banda sonora", e outros ao estilo de calquera festival que se precie. Tampouco faltou o glamour da alfombra vermella pola que entraron os verdadeiros protagonistas: os socios e socias da asociación, participantes das actividades, ou non. O Filmou constituiu tamén un encontro da comunidade asociativa, que tivo unha moi boa resposta, con perto de 50 asistentes, que compartiron merenda e conversa amigable ao rematar as proxeccións. Sen dúbida unha magnífica despedida do ano asociativo da Fervenza de Ouzande