Imaxes da Ruta dos Carreiros de Ouzande 2014

Este primeiro de maio tivo lugar a primeira das rutas de primavera programadas pola AC A Fervenza de Ouzande, dentro do seu programa Imos Andar. Os 21 participantes na camiñata partiron ás 10 da mañá da igrexa de Ouzande regresando ao mesmo lugar ás 13:30, despois de percorrer os 11 km anunciados. Achegáronse aos camiños do monte da parroquia de Ouzande despois de andar os carreiros dos diferentes lugares da mesma. O bo ambiente e a conversa acompañou aos camiñantes, que se citaron para a próxima convocatoria da Fervenza, o vindeiro 17 de maio. Aí quedan as mellores imaxes:

IX RUTA DAS LETRAS

ANDAMOS, FALAMOS E LEVAMOS UN LIBRO PARA A CASA 

AS RUTAS DA FERVENZA DE OUZANDE  

A Fervenza de Ouzande continúa co programa “Imos andar”, coa Ruta das Letras que chega á súa novena edición. Nesta ocasión realizaremos a ruta “Subida ao monte Pedroso”

Será o sábado 17 de maio, con saída ás 10:00 da mañá e regreso ás 13:30 (Igrexa de Ouzande) Ao final do roteiro, todas as persoas participantes serán agasalladas cun libro en galego en conmemoración do Día das Letras.

A actividade é gratuíta e poden participar todas as persoas que o desexen, socias ou non socias. No transcurso da camiñata haberá algunha sorpresa literaria en relación coa obra do autor homenaxeado, X. M. Díaz Castro

ACCESOS: Hai que saír da igrexa de Ouzande (A Estrada), situada a 1 km do centro urbano da vila en dirección sur; rúa Pérez Viondi e travesía de Ouzande (sinalizada). A igrexa está a man esquerda.

PUNTO DE PARTIDA / CHEGADA: A citada igrexa, é unha ruta circular, alí hai sitio para estacionar os turismos. Este é o mapa.
MAPA DO PUNTO DE SAÍDA PINCHANDO AQUÍ

PERCORRIDO: 11 quilómetros, atravesando o monte de Ouzande, cara os montes da parroquia limítrofe da Somoza. Inclúe a subida ao Monte Pedroso (577 m de altitude). Regreso polos bosques frondosos da aba do monte Pedroso cara Ouzande.

DIFICULTADE: Media

DURACIÓN: 3h e media

MATERIAL: levar roupa cómoda (chándal, botas de montaña...) e ter en conta a predición meteorolóxica. Podes levar prismáticos.

PUNTOS DE INTERESE: no noso percorrido habémonos atopar cos seguintes puntos de interese:

- Monte do Pedroso (A Somoza): Ofrece fermosas vistas paisaxísticas cara ao val do río Liñares co monte da Rocha ao fondo. Tamén se divisa neste percorrido a vila da Estrada desde numerosas perspectivas, así como a cidade de Compostela, o val do río Ulla, Pico Sacro, montes da Somoza... O alto do Pedroso, obxectivo da ruta, sitúase a 577 m de altitude, e permitirá gozar aos camiñantes de vistas como as indicadas, e mesmo, en caso de boa visibilidade, da contemplación das Rías de Arousa e Pontevedra.

- Monte Cabalar: A rota discorre en parte a través das parcelas incluídas no coñecido proxecto “Monte cabalar”, o que nos permitirá disfrutar do excelente estado en que sen conserva o monte, así como contemplar os rabaños de cabras e mandas de cabalos e vacas en liberdade.

No transcurso da ruta atravesaremos varias masas de bosque autóctono con abundantes carballeiras, castiñeiros, acivros, e vexetación de ribeira, á beira dos numerosos regatos que cruzaremos no percorrido.

ESTE SERÁ O PERCORRIDO QUE REALIZAREMOS

Ruta dos Carreiros de Ouzande 2014

Comezan as rutas d´A Fervenza de Ouzande en 2014. Non é necesaria a inscrición previa. De balde para calquera persoa interesada, socia ou non socia da Fervenza de Ouzande.

Toda a info sobre a primeira, o próximo xoves 1 de maio:

ACCESOS: Hai que saír da igrexa de Ouzande (A Estrada), situada a 1 km do centro urbano da vila en dirección sur; rúa Pérez Viondi e travesía de Ouzande (sinalizada). A igrexa está a man esquerda.

PUNTO DE PARTIDA / CHEGADA: A citada igrexa, é unha ruta circular, alí hai sitio para estacionar os turismos.

PERCORRIDO: 11 quilómetros, atravesando os diferentes lugares de Ouzande (O Redondo, O Castro, O Picoto, O Formigueiro e Alemparte) polos antigos carreiros e camiños, reparando en diferentes puntos de interese como fontes, lavadoiros e antigas calzadas. Unha parte do roteiro cruzará o monte de Ouzande, con numerosas carballeiras e pequenos bosques de acivros. Tamén percorreremos un tramo da Ruta da Fervenza e muiños de Ouzande.

DIFICULTADE: baixa, con tramos de media-baixa.

DURACIÓN: 3h e media

MATERIAL: levar roupa cómoda (chándal, botas de montaña...) e ter en conta a predición meteorolóxica.

SAÍDA: 10:00 (Igrexa de Ouzande)

REGRESO: 13:30h (Igrexa de Ouzande)

PUNTOS DE INTERESE: no noso percorrido habémonos atopar cos seguintes puntos de interese:

-igrexa de Ouzande: É de estilo orixinalmente románico, conserva elementos da época coma os canzorros que son únicos na zona ao representaren pecados condenados pola Igrexa. Tamén destaca o seu arco central, o agnus dei, o retablo barroco do Carme...

-cruceiros: hai dous que están nas inmediacións da igrexa, un deles é dos máis antigos da zona, foi recollido por Castelao en As Cruces de Pedra da Galiza.

-muíños da Fervenza: conxunto formado por sete muíños distribuídos en pouco máis de cincocentos metros, o máis antigo data do S.XVIII. É unha zona de especial beleza pola vexetación que conserva numerosas especies autóctonas (varias carballeiras, bosque de acivros, vexetación do curso fluvial do regueiro da Fervenza, salgueiros, ameneiros...). Destaca a orografía que crea neste punto a famosa Fervenza, aínda que son numerosos os cachóns ou pichos, ao longo desta parte de percorrido fluvial na nosa ruta.

-vistas panorámicas: fermosas vistas paisaxísticas cara ao val do río Liñares co monte da Rocha ao fondo. Tamén se divisa neste percorrido a vila da Estrada desde numerosas perspectivas,  así como a cidade de Compostela, o val do río Ulla, Pico Sacro, montes da Somoza, Torre de Guimarei...

Aí queda unha imaxe co percorrido que se ha realizar:

IMOS ANDAR. RUTAS PRIMAVERA 2014

A AC A Fervenza de Ouzande programa unha nova edición da actividade IIMOS ANDAR para a primavera deste 2014. Inclúe 3 rutas de sendeirismo que se detallan abaixo e que teñen como obxectivos fundamentais: a difusión e coñecemento dos valores medioambientais, paisaxísticos e do patrimonio arquitectónico da parroquia de Ouzande e das parroquias da contorna, como A Somoza, Tabeirós, Lugar de Ferreiros, etc.; tamén se trata de favorecer a participación de persoas socias e público en xeral, nunha actividade saudable e permitir a convivencia activa entre todos e todas.

Todas as rutas terán como punto de partida e chegada a Igrexa de Ouzande. A saída será sempre ás 10 da mañá e o regreso ás 13:30 horas. Todas terán unha dificultade media ou media-baixa para facilitar a participación nas mesmas. Serán gratuítas e abertas tanto a persoas socias como ao público en xeral.

1. Xoves 1 de maio.. Ruta dos carreiros de Ouzande. Percorreremos os diferentes carreiros polo monte e os diferentes lugares de Ouzande, incluíndo a Fervenza e os muíños.

2. Sábado 17 de maio. IX Ruta das Letras. Subida ao Monte Pedroso. Todas as persoas participantes serán agasalladas cun libro en galego.

3. Domingo 1 de xuño. Ruta Ouzande-Tabeirós-A Somoza

imaxes dos Cantos de Taberna en Arzúa con Retrouso e Recanto

O pasado sábado, 5 de abril de 2014, tivo lugar na vila de Arzúa unha nova edición da Festa da Gaita e dos cantos de Taberna. O Grupo ouzandés Retrouso, acompañado unha vez máis polo grupo de cancións Recanto, formou parte do cartel da actividade. Despois dun pasarrúas en homenaxe da familia Seivane, e dun xantar popular, deron comezo os Cantos de Taberna. Os ouzandeses e ouzandesas fixeron as delicias dos clientes dos bares por onde pasaron, interpretando o seu repertorio, e mesmo actuando polas rúas arzuanas. Aí quedan as mellores imaxes.

imaxes da 1ª edición dos cantos de taberna da Estrada

O pasado sábado o Grupo Retrouso, acompañado do Orfeón Recanto, participou na primeira edición da actividade organizada polos bares da Zona dos Viños da Estrada e pola AC Regatos. Nunha mañá na que o tempo acompañou, unha decena de grupos chegados de diferentes puntos da zona animaron as rúas estradenses e os bares da zona. A actividade tivo unha exquisita organización e a festa prolongouse ata altas horas da noite.

Retrouso e mais Recanto de Ouzande nos CANTOS DE TABERNA DA ESTRADA

O próximo sábado, 22 de marzo terá lugar a primeira edición dos CANTOS DE TABERNA DA ESTRADA organizados polos Bares da Zona dos Viños e pola AC Regatos. Retrouso, ben acompañado polo grupo de cancións Recanto, participará na festa da que vos deixamos o cartel anunciador. Estás convidado/a

 

Cartel cos horarios e bares

O noso agradecento aos amigos de REGATOS polo convite.

Imaxes do Antroido 2014 en Ouzande

As mellores imaxes do Antroido 2014. O pasado 1 de marzo, o OUZANDE FASION WEEK trouxo aos famosos e famosas á parroquia. Desfile e Fotocol. As catiuscas e as batas foron tendencia. As cegas cantaron as súas coplas e festa e merenda para todos.

coplas das cegas 2014

cambios na programación do antroido 2014

Por causa das condicións metereolóxicas previstas para o día de hoxe, queda suspendida a caravana antroideira en tractor pola parroquia. A partir das 7 da tarde  merenda e gran festa de disfraces no local social. Pase de modelos, PHOTOCALL DE FAMOSEO, DJ´S..... e moita festa. Merenda de antroido para recuperar forzas, e todo de balde e para todos e todas. NON FALTES