Este
sábado, 21de xuño, a partir das 20 horas, no campo da
festa de Ouzande, terá lugar o peche festivo das clases de música, baile
e
canto tradicional correspondente ao presente curso 2024-2025, que
incluíron as disciplinas de gaita, percusión, canto, pandeireta e baile
tradicional. Unhas 30 persoas acudiron á súa cita semanal nestas
modalidades.
O evento do próximo sábado iniciarase coas
actuacións do alumnado a fin demostrar
a súa progresión nas diferentes disciplinas das clases.
Convidamos tamén
a que as persoas que o desexen traian os seus instrumentos e ganas de
pasalo
ben para continuar coa festa.
40 persoas de todas as idades participaron nunha nova edición da
excursión anual da Fervenza de Ouzande que ven levando adiante a
iniciativa dende 2002. Precisamente o destino deste ano era o mesmo que
o da primeira edición co engadido da visita matinal Santa Mariña de
Augas Santas.
A expedición ouzandesa foi recibida polo guía de
Xeitura, que foi o encargado de facer un interesantísimo percorrido
guiado pola aldea onde se sitúa a impresionante igrexa románica de Santa
Mariña que tamén visitaron.
A seguir completaron o roteiro
que os levou á cibdá de Armea, un enclave galaico romano, que non hai
moitos anos que está musealizado e é visitable. No camiño fixeron
paradas en diferentes lugare de interese como o asento da santa, o forno
da santa (unha antiga sauna prerromana), ou as pioucas da santa.
Este percorrido, que ocupou toda a mañá sorprendeu fixo as delicias de todos e todas as asistentes.
O
xantar campestre tivo lugar na praia fluvial de Acearrica, perto do
casco urbano de Allariz. Despois dun descanso o grupo realizou a
planeada visita ao fermoso núcleo urbano medieval de Allariz, subindo
mesmo ao monte do Castelo.
Para rematar, visitarom o rechamante Festival de Xardíns de Allariz, nas beiras do río Arnoia.
Felices e contentos regresaron a Ouzande na hora prevista.
EXCURSIÓN A ALLARIZ E SANTA MARIÑA DE AUGAS SANTAS Programa:
9.00. Saída (Igrexa de Ouzande)
Parada café Visita á Igrexa románica de Santa Mariña de Augas Santas Roteiro arqueolóxico ata a Cibdá de Armeá (xacemento romano) Xantar en Allariz ao aire libre na praia fluvilal de Acearrica Visita guiada pola vila histórica de Allariz Visita ao Festival de xardíns de Allariz Tempo libre
21:00. Chegada a Ouzande
Prezos
20 euros para persoas socias 12 euros para persoas socias menores de 18 anos 25 euros para persoas non socias de calquera idade
Cada persoa debe levar a súa propia comida
Inscricións enviando correo a carreirosouzande@gmail.com na Taberna de Ouzande: 986570285
Recomendamos levar roupa e calzado cómodo e estar atentos/as ás predicións metereolóxicas. En caso de chuvia, comeremos a cuberto.
Ánimate a probar a experiencia de ir de excursión coa Fervenza de Ouzande.
Ruta das Lagoas O DOMINGO 18 de maio, terá lugar unha nova edición da Ruta das Letras, organizada pola Asociación. A actividade realizouse por primeira vez no ano 2006 e volve un ano máis á programación de primavera da Fervenza de Ouzande.
A saída será ás 9:30 da mañá e regreso ás 13:30 (Igrexa de Ouzande)
Ao final do roteiro, todas as persoas participantes serán agasalladas cun libro en galego en conmemoración do Día das Letras e da nosa lingua.
A actividade é gratuíta e poden participar todas as persoas que o desexen, socias ou non socias.
PERCORRIDO:12 km.
DIFICULTADE: baixa
MATERIAL: é preciso levar roupa cómoda (chándal, botas de montaña...), tendo en conta a predición metereolóxica.
A actividade só se suspenderá en caso de que as condicións climatolóxicas impidan completamente o desenvolvemento da mesma.
A actividade conta coa colaboración do Concello da Estrada.
LUGARES DE INTERESE:
Lagoas de Zoo: Nesta saída habemos achegarnos ao alto do monte do lugar de Zoo, xa no Concello de Cuntis, a un lugar no que de invernos se forman lagoas de auga doce grazas ao efecto da choiva e á escasa drenaxe do solo.
Espazos naturais e paisaxe: A ruta combina espazos naturais autóctonos con zonas moi deterioradas polo efecto do home nas que se fixeron grandes plantacións de eucaliptos mesmo en zonas de humedais e turbeiras de grande valor ecolóxico. Tamén, recentemente, foron instalados varios muiños de vento, cuxas obras provocaron certo impacto na contorna e o deterioro de algunhas paraxes. Apreciaremos a diferencia na vexetación en función da altura, posto que na zona das lagoas esta é propia de monte alto, fronte aos bosques que temos na saída de Ouzande.
Encoro da Estrada: Pasaremos pola beira do antigo encoro que abastecía de auga á vila da Estrada, convertido hoxe en día nunha lagoa na que destaca a vexetación propia de ribeira así como a presenza dalgunhas aves migratorias nalgunhas épocas do ano.
Monte Cabalar: baixaremos atravesando a zona ocupada pola cooperativa Monte Cabalar, na aba sur do Monte Pedroso, o que nos permitirá disfrutar do excelente estado en que sen conserva o monte, así como contemplar as mandas de cabalos e vacas en liberdade.
Un animoso grupo de persoas responderon á convocatoria da Fervenza de Ouzande o pasado sábado 1 de marzo.
Desfilaron polo local social unha variada mostra de personaxes procedentes do outro lado do Atlántico rematando por identeficarse completamente coa nosa cultura, tocando, cantando e bailando música tradicional. Aí quedan as mellores fotos, picando na imaxe:
O pasado 9 de febreiro, unhas 50 persoas acudiron á chamada da AC A
Fervenza de Ouzande para celebrar a súa Xunta Xeral Anual. Nesta ocasión
correspondía a renovación da xunta directiva, que ten lugar cada dous
anos. Como xa se anunciara, o ata agora presidente non se presentaba á
reelección, polo que se escollería nova presidencia.
Na
asemblea aprobáronse por unanimidade os informes económico e de xestión
do ano 2024 e proxectouse como é habitual un vídeo resume das
actividades realizadas.
A
continuación procedeuse a elección, tamén por unanimidade da nova xunta
directiva encabezada por Noelia Bouzón Docampo, ata este momento
vicepresidenta da asociación. Foi escollida como vicepresidenta Laura
Carbajal Saborido, como secretaria Inés Bugallo Puente e como
tesoureira, Laura Herraiz Cabanas (a única persoa que repite "cargo"). O resto da nova directiva está formado por: Malusa Rodríguez Pazos, Rosa Herraiz Cabanas, Manuel Rosende Torres, Isabel Durán Parada, Manuel Ángel Bouzón Fernández, Manuel Porto Gestoso, Cristina Riveira Porto, Manuel Uzal Docampo, Almudena Serantes Puente, Patxi López Durán, María Troitiño Seoane, Ana Gestoso Froján e Pablo Neiro Mogo.
A
reunión non estivo exenta de momentos de emotividade ao
producirse a despedida de Xabier Camba como presidente, que dedicou
unhas palabras de agradecemento e cariño aos seus compañeiros e
compañeiras de directiva e aos socios e socias presentes.
Tamén
foi sorprendido con diferentes "agasallos" como un cadro cunha
selección de fotos destes anos, unha torta conmmemorativa, un vídeo e
mesmo a actuación musical do grupo da asociación, Retrouso.
A xuntanza rematou coa tradicional merenda de convivencia a base de chocolate con rosca.
Picando na imaxe podes ver moitas fotos do evento:
E tamén podes repasar as actividades de 2024 neste vídeo:
Convócase Xunta Xeral anual da Asociación Cultural A
Fervenza de Ouzande, que terá lugar o
domingo 9 de febreiro de 2025 ás 6 da tarde no local social do campo da
festa de Ouzande. A orde do día será a seguinte:
1. Informe de xestión
2. Elección de Xunta Directiva
3. Previsión de ingresos e gastos para o ano 2025
4. Programación anual.
5. Rogos e preguntas.
Ao rematar a reunión a asociación convida á merenda con chocolate quente
e rosca.
En Ouzande, A Estrada, febreiro de 2025
Na reunión estarán xa a disposición de todos os socios e socias os
recibos da cota anual deste ano. Despois da reunión quedarán na Taberna de
Ouzande para quen desexe pagalos.
Trátase dunha reunión
moi importante para o futuro da asociación. Nesta xunta deixará de ser
presidente Xabier Camba e escolleremos xunta directiva e novo presidente ou
presidenta.
Anímate a participar.
A asociación facémola entre todos e todas.
Un grupo de 12 persoas respondeu a convocatoria da Fervenza de Ouzande.
Percorreron os 10 quilómetros de camiño nas tres horas previstas nun
ambiente de boa conversa e camaradería. O tempo apracible e as fermosas
paisaxes fixeron moi levadeiro este paseo matinal no día de nadal.
Premendo na imaxe poderás ver as mellores fotos da actividade:
